Alguien poco corriente
¿Qué faigo yo nesti sitiu tan escuru? ¡ Socorro, socorro! ¡Quiero salir! Esto tá que nun veo ni torta. ¡Aay!. Una manona enorme y peluda tá a puntu d’espachúrrame. ¡Non, que non! ¡Yo nun quiero una casa con verxes! ¡Quiero escapar per onde seya! ¿Y quiénes son estos? ¿Onde toi?
- Esti periquitu tá como una regaera -diz la neña- a ti tomáronte’l pelo pá, tú mira, nun fai más que’l picu rabucu. Podíes lleválu pa un circo. Non, claro, y nun se vos ocurrirá más que xuntálu col mariellu. Mira que carina tienen los dos, vamos, ¡ Pa volvenos a toos llocos!
- ¡Calla, calla! –diz la ma de la neña- que faen buena pareya. Al marielu llamarémoslu Mingo.
- Sí, home, sí ¡Lo que mos faltaba!, y al otru, nun me digas más, que ya lo toi viendo venir... ¡Taresa! ¿non? –repuso la neña-.
- Pues sí, acertasti de pleno -atayó la ma-.
- ¡Bueeno, bueeenoo! Menos dar la parpayuela – dixo’l pa de la neña mui seriu- y a pone-y a estos probinos agua nel bebederu y ¡alpiste!, que tan muertos fame.
¡Uy, uy! ¿Pero esto qué ye? ¿Pa qué me despierten tan ceu? Cagon la mar...Ye l’amu, que va trabayar pa la mina. Tengo un suañu... Pero ná, qu’habrá que face-y la gracia! Porque lluéu nun me pon lechuga, y… ¡Gústame tanto! Faigo lo que seya por una fueyina.
- ¡Bonos díes pitufo! –diz l’amu-
Sí, sí. ¡Lo que faltaba! Pitufo, pitufín, piti, enanu -pa la neña-, Taresa -pal ama- Si a esti pasu ¡Van volveme toos llocu! Amás, que nun soi fembra, pero… ¿Pa cuándu se van a enterar? ¡Qué soi machu, carayu! Tantos años viviendo equí y en tovía nun s’enteraron de la fiesta. Yo, yo... lo que quiero ye que me devuelvan a la miocollacia. Que tamién...Vaya nome que fueron a planta-y a la probina... ¡Mingo! Mira que llamála Mingo. Nun había nomes más guapinos...
La culpa, la culpa túvola’l mio amu. Sacónos un día a los dos y cuando tábamos enriba la nevera faciéndonos carantoñines, bien él cola su manona… dando- y tal sustu que… ¡Salió d’estampida pela ventana que taba entreabierta! Non, eso si que nun-y lo perdono yo.
- ¡Piti, piti! ¡Ven, ven! -diz el so amu-
- ¡Dizme que ven ,ven! Pero ¿Cómo? ¿Acaso tengo yo cara perru? ¿Cuándu se vió cosa paecía! Pero ya sé yo por qué ye... ¡Cagon diez!... Un día tábamos de vacaciones nel pueblo del ama, marcharen ellos pa la playa y dexáronme colgáu nel tendal ¡Qué ocurrencies, hombre, qué ocurrencies! Casi nin lo cuento. Primero, primero cayó una tormenta. ¡Una pingaura!... Que daba igual, ponéme enriba que debaxu, porque pusiérame onde me pusiera la mio casa nun tenía más que goteres. Pero non, non, que lo meyor taba por venir. Cuando ya abocanare un pocoñín ¡Apaez pela esquina un animalón con unes oreyes picudes, a cuatro pates y meneando’l rabu de contentu...! Merendar, nun me merendó, pero, ente’l catarru que garré y el sustu que tenía metíu nel cuerpu, cuando llegó’l mio amu y dixo: “¡Hola Pitufo!”. Yo, en llugar de responde-y con un cordial “¡pío, pío!”, solte-y un: “¡GUAU GUAU!” qu’aquel tornóse pálidu y dixo-y a la muyer:
- “¡María, María! Esti páxaru dende que-y marchó l’amiga, ¡Tá como un cestu nueces! Recuérdame merca- y el llunes una correína pa sacálu a pasiar pela güerta.”
